Scéal Fleetwood

Ainmníodh an comhlacht as an gcarr ab ansa le Andrew Doyle. An Cadillac Fleetwood as Meiriceá. Sheas sé do na luachanna inar chreid sé: ardchaighdeán gan sárú, innealtóireacht nuálach agus dearadh a tharraingíonn an tsúil. Is iad an cheardaíocht agus an muintearas atá ag croí Fleetwood inniu.

Comhlacht is ea é atá tugtha don ardchaighdeán agus don bharántúlacht, a bhfuil tuiscint ghéar aige ar an am atá thart agus súil ar an am atá le teacht. Tá trí ghlúin de chlann Doyle tar éis gach iarracht a dhéanamh chun péint den chéad scoth a tháirgeadh.

Nuair a cheannaíonn tú canna phéint Fleetwood, is féidir a bheith cinnte go dtagann sé go díreach ónar dteaghlach go dtí do theaghlach féin.

Níor tosaíodh an comhlacht le péint ach le scuaba, áfach. Sa bhliain 1950, ba ghnáth le Andrew Doyle dul isteach i lár na cathrach ar a rothar lena bheirt mhac chun fuíollghearrthóga stáin a bhailiú ó mhonarcha bhriosca Jacob’s. Ba i seid bheag taobh thiar de theach an teaghlaigh i gCluain Tarbh i mBaile Átha Cliath a múnlaíodh an drámh-mhiotal i mbiannaí, na bandaí a choimeádann na guairí ina n-áit. Ó na biannaí tháinig scuaba – scuaba ealaíne ar dtús, agus ansin scuaba cosmaideacha a cheannaíodh leithéidí Max Factor, agus sa deireadh scuaba péinteála, atá fós á ndéanamh againn inniu.

I dtús báire, rinneadh na guairí as ribí róin agus cuireadh le hanlaí deasa adhmaid iad. Níos déanaí, bhí sé lárnach do rath Fleetwood go bhfanfadh na guairí ina n-áit. Gach lá d’fhaigheadh Conor Doyle samplaí de na táirgí a rinneadh an lá roimhe agus dhéanadh sé seiceáil ar bhosca amháin as gach beart. Ansin, dhéanadh sé na guairí a leathadh, agus dá dtitfeadh guaire ar bith den scuab, ghlaoití ar an maoirseoir…

Bhí Fleetwood ar cheann de na chéad chomhlachtaí in Éirinn a bhí ag infheistiú go forleathan i dtaighde agus forbairt, agus, rud ab annamh ag an am, fostaíodh ceimiceoir chun líonaigh agus greamachán páipéar balla nua a fhorbairt. An toradh a bhí ann ná taos ‘a fhanann greamaithe nuair a éiríonn na cinn eile as’ – de réir fhógraí na linne.

Bhí méadú ag teacht ar easpórtálacha freisin agus go luath sna seachtóidí osclaíodh monarcha taobh amuigh de Kingston, Iamáice. Ba é Brian Kavanagh Senior a bhunaigh an mhonarcha, agus bhí Tom O’Connell á reáchtáil tamall ina dhiaidh sin, beirt a raibh gean orthu sa tionscal agus a rinne cairdeas le húinéirí siopaí crua-earraí ar fud réigiún Mhuir Chairib, chomh maith le húinéirí na siopaí rum!

Go gairid ina dhiaidh sin, bhain Fleetwood clú agus cáil amach in Éirinn – a bhuí le ceoilín fógraíochta ar an raidió a bhí somheabhraithe agus a fhanann le go leor daoine sa lá atá inniu ann. Agus iad ina suí ag deasc oifige, d’oibrigh Conor Doyle agus an fear fógraíochta Bob McCabe ar leaganacha difriúla de mhana fógraíochta a rachadh i bhfostú i gceann na glúine ar fad agus a d’fhanfadh sa deich gceoilín fógraíocht ab ansa in Éireann go ceann blianta fada. Luaigh Fleetwood le duine ar bith níos sine ná 30 bliain d’aois agus is dócha go gcanfaidh siad leagan de seo…

Bhí leaganacha difriúla den fhógra sin le feiceáil ar feadh na mblianta. Bhí leagan Hollywood ann, fiú, a bhí tráthúil ag an am. Cuireadh an cheist an bpéinteálfadh Fleetwood seomra Sharon Stone bándearg le meaitseáil lena “basic instinct”. An freagra: “Fleetwood would”.

Tá rath an mhana seo ina eiseamláir de dhearcadh Fleetwood, mar atá, mar a bhí agus mar a bheidh i gcónaí: comhlacht teaghlaigh ina bhfuil foirne ag obair le chéile agus an teicneolaíocht ina cuiditheoir in áit a bheith ina bainisteoir.

Tá péint déanta ag Fleetwood do bhrandaí ar nós Tesco agus Dunnes Stores agus bhíomar ar cheann de na comhlachtaí ba thúisce a dhear coimeádán trédhearcach le ligeann do chustaiméirí an dath a fheiceáil níos fearr. Agus chruthaíomar ceann de na chéad phailéid “hint of…” a bhí lárnach sa bhorradh maisiúcháin le blianta beaga anuas.

Úsáideadh ár bpéint in a lán foirgnimh shuntasacha lena n-áirítear an tÓstán Shelbourne i mBaile Átha Cliath, Teach an Ardmhéara, geataí Áras an Uachtaráin, agus Coláiste Ríoga na Máinlianna. Rud eile a sholáthair Fleetwood ná an phéint dhubh don sainchomhartha Geata San Séamas, i ngrúdlann cháiliúil Guinness.

Rinneadh comhoibriú suntasach go minic i gcaitheamh na mblianta. Sa bhliain 2013 lainseáil Fleetwood an bailiúchán Popular Colours, comhpháirtíocht le mórdhearthóirí intí Éireannacha le pailéad nua-aimseartha de dhathanna intí a chur chun cinn. Sa deireadh bhí sé ina bhailiúchán dathanna ba mhó tóir in Éirinn.

Sa bhliain 2007 d’oibríomar le Jeff Banks, láithreoir den chlár teilifíse The Clothes Show, ar thaitin muga seacláid the leis agus é san oifig ar cuairt. Tugadh Lazy Paint ar an réimse nuálach ildromchla a cruthaíodh agus d’fhéadfaí í a úsáid ar rud ar bith ó bhallaí go miotal nó adhmad.

Tá an timpeallacht tábhachtach do scéal Fleetwood freisin, agus tá an fhoireann airdeallach i gcónaí ar éifeachtaí ár gcuid oibre ar an dúlra thart orainn. Déantar péint Fleetwood ar fad anseo in Éirinn agus bhíomar chun tosaigh maidir le haire a thabhairt don timpeallacht nádúrtha: an t-uisce, na lochanna, an dúlra agus an tírdhreach timpeall orainn.

Bhí Conor Doyle diongbháilte i dtaobh an chomhshaoil go luath. Roghnaíodh suíomh Fleetwood i gContae an Chabháin mar gheall ar an timpeallacht shuaimhneach agus ar an gcóngaracht do Loch Ramhar. Chuir Conor coill fuinseoige ar an suíomh in Achadh an Iúir agus maireann a oidhreacht fós. Na laethanta seo, tá foireann d’ochtar deonach de chuid Fleetwood atá ag leanúint eiseamláir Conor agus iad ag plandáil timpeall an tsuímh agus rinneadh cluainte ar mhaithe leis an bhfoireann agus leis an bhfiadhúlra araon. Agus déanann na deonaigh a ndícheall chun speiceas amháin atá faoi chosaint a chothú, planda neamhchoitianta darb ainm an gliográn.

Mar Stiúrthóir Bainistíochta, tá Stan Buckley ag leanúint oidhreacht Conor agus is eisean atá taobh thiar d’fhorbairt, de nua-aoisiú agus de mhéadú leanúnach ár gcomhlachta déantúsaíochta, agus cúraimí maidir leis an gcomhshaol fós ag barr an chláir oibre. Tá sé ina aidhm ag Fleetwood feabhas a chur ar a bhfuil timpeall air agus tá Stan ina threoraí ar an bpróiseas sin.